 |
| التحكم في الكمبيوتر من الهاتف |
تخيل تفتح
كمبيوترك اللي في البيت وهو مطفي تماماً ومفصول عن الفيشة، وتتحكم فيه بالكامل
وأنت قاعد في كافيه أو مسافر برة بلدك.. من غير ما تلمس الكيسة ومن غير ما تطلب من
حد في البيت يدوس لك على زرار الباور! 🤯👇
الحركة دي
أنقذتني في موقف صعب جداً.. كنت برة ومزنوق في تسليم شغل مستعجل، والمشكلة إن
الملفات كلها كانت على هارد الكمبيوتر في البيت، والجهاز مطفي ومفيش حد في البيت
أصلاً عشان يفتحهولي! طبعاً لو كنت استنيت لما أرجع، كان زمان الشغل راح عليا
والوقت ضاع.
وقتها طلعت
الموبايل من جيبي، فتحت أبلكيشن، وبضغطة واحدة الجهاز اشتغل من الصفر قدامي، وخلال
ثواني كنت جوة شاشة الكمبيوتر، بعت الملف وقفلته تاني وأنا قاعد بتشرب قهوتي برة
عادي جداً!
السر كله في
دمج حيلتين بسيطين جداً ومتاحين لأي حد، تخليك متحكم في جهازك بنسبة 100% (تفتحه
وهو مطفي، تشتغل عليه، وتقفله بأمان).
1️⃣ المرحلة الأولى: إزاي تفتح الكمبيوتر
وهو مطفي تماماً؟ 🔌⚡
عشان تتفادى
الحوارات المعقدة بتاعت ضبط الراوتر والـ IP، فيه أسهل وأرخص طريقة في العالم بتشتغل مع
أي جهاز كمبيوتر:
- الفيشة
الذكية (Smart Plug): هشتري
فيشة ذكية بسيطة (موجودة أونلاين وفي محلات الإلكترونيات وسعرها بسيط جداً)،
وتركب فيها فيشة الكمبيوتر وتربطها بـ الواي فاي بتاع البيت عن طريق أبلكيشن
الموبايل بتاعها.
- حيلة
الـ BIOS البسيطة: افتح الكمبيوتر وادخل على شاشة
الـ BIOS (بتدوس F2
أو Del أول
ما الجهاز يفتح).. دور على
خيار اسمه AC Power Loss Restore أو Restore on AC Power وخلي خيارها Power
On.
- السر
هنا إيه؟
الحركة دي بتفهم الكمبيوتر إنه أول ما الفيشة الذكية تتوصل بالكهرباء، الجهاز
يفتح أوتوماتيك من غير ما تدوس على زرار الباور! يعني تفتح الفيشة من
الموبايل وأنت برة البيت، الكمبيوتر هيشتغل فوراً.
2️⃣ المرحلة الثانية: التحكم الكامل في
الشاشة والملفات 📱💻
بعد ما الجهاز
اشتغل، محتاجين ندخل عليه كأننا قاعدين قدامه:
- هتفتح
متصفح كروم على الكمبيوتر وتنزل إضافة مجانية اسمها Chrome
Remote Desktop وتعمل
رقم سري (PIN) مكون من 6 أرقام.
- هتنزل
تطبيق Chrome Remote Desktop على موبايلك، وتأكد إنك فاتح
نفس إيميل الجيميل.
- هتلاقي
اسم كمبيوترك ظهر قدامك ونقطة خضراء معلنة أنه أونلاين.. اضغط عليه واكتب الـ PIN، وبكده شاشة الكمبيوتر كلها فتحت قدامك
على الموبايل! تحرك الماوس، تفتح الملفات، وتشتغل بحرية كاملة.
3️⃣ المرحلة الثالثة: القفل الآمن للجهاز 🔒
لما تخلص شغلك،
أوعى تقفل الفيشة الذكية على طول وهي الشاشة شغال عشان الهارد والملفات ما يتأذوش!
- من
جوة الموبايل ادخل على قائمة Start في
الويندوز واعمل Shutdown عادي جداً.
- بعد
ما تأكد إن الكمبيوتر طفي نهائياً، افتح أبلكيشن الفيشة الذكية واقفلها من
الموبايل.. وبكده تكون قفلت الدائرة بأمان 100%.
💡 نصيحة مهمة جداً عشان التجربة تنجح: ادخل على إعدادات الطاقة في الويندوز (Power & Sleep) وخلي خيار الـ Sleep على Never عشان الجهاز ما ينامش وأنت برة البيت وما تعرفش توصل له.